Deu 29 | NdeIBE | STEP | Lezi yizimiso zesivumelwano uJehova alaya uMosi ukuthi azenze labako-Israyeli eMowabi, phezu kwesivumelwano leso asenza labo eHerobi.

Deuteronomy 29

Ukuvuselelwa kwesivumelwano

1 Lezi yizimiso zesivumelwano uJehova alaya uMosi ukuthi azenze labako-Israyeli eMowabi, phezu kwesivumelwano leso asenza labo eHerobi. 2 UMosi wabiza bonke abako-Israyeli wathi kubo: Amehlo enu akubonile konke iNkosi eyakwenza kuFaro eGibhithe, kuzikhulu zakhe zonke lakulo lonke ilizwe lakhe. 3 Ngamehlo enu lazibonela imilingo emikhulu, lezibonakaliso ezimangalisayo kanye lezimanga ezesabekayo.

4 Kodwa kuze kube lamuhla uJehova kaliphanga ingqondo ezwisisayo, kumbe amehlo abonayo, loba izindlebe ezizwayo. 5 Okweminyaka engamatshumi amane ngilihola enkangala, izigqoko zenu kazizange ziguge, loba izicathulo ezinyaweni zenu. 6 Alidlanga sinkwa loba ukunatha iwayini kumbe ukunatha okudakayo. Ngakwenza lokhu ukuze lazi ukuthi mina nginguJehova uNkulunkulu wenu.

7 Kwathi ekufikeni kwenu kulindawo, uSihoni inkosi yaseHeshibhoni kanye lo-Ogi inkosi yaseBhashani balihlangabeza ukuze balwe lani, kodwa sabehlula. 8 Salithatha ilizwe labo salipha abakoRubheni, abakoGadi kanye lengxenye yesizwana sakoManase njengelifa.

9 Ngakho gcinani izimiso zalesisivumelwano ukuze liphumelele kukho konke elikwenzayo.

10 Lonke limi lapha lamuhla phambi kukaJehova uNkulunkulu wenu – abakhokheli benu kanye lezinduna zenu, abadala benu kanye lezikhulu zenu, kanye lawo wonke amanye amadoda ako-Israyeli, 11 ndawonye labantwabenu kanye labafazi benu, abezizwe abahlala ezihonqweni zenu beligamulela inkuni njalo belithwalela amanzi.

12 Selimi lapha ukuze lingene esivumelwaneni loJehova uNkulunkulu wenu, isivumelwano uJehova asenzayo lani lamuhla esiqinisa ngesifungo, 13 eveza ngokugcweleyo ukuthi lina lamuhla selingabantu bakhe, lokuthi abe nguNkulunkulu wenu njengokulithembisa kwakhe njalo wafunga kubokhokho benu, u-Abrahama, u-Isaka loJakhobe. 14 Ngenza lesisivumelwano, langesifungo saso, hatshi lani kuphela 15 elimiyo kanye lathi lamuhla phambi kukaJehova uNkulunkulu wenu kodwa lalabo abangekhoyo lamuhla.

16 Lina ngokwenu liyakwazi ukuthi sasiphila njani eGibhithe lokuthi sadabula njani phakathi kwamazwe sisiza kulindawo. 17 Labona phakathi kwabo izithombe zabo ezinengisayo ezenziwe ngezigodo lezamatshe, ezesiliva kanye lezegolide. 18 Banini leqiniso lokuthi akulandoda loba owesifazana, abosendo kumbe isizwana phakathi kwenu lamuhla olenhliziyo ezafulathela iNkosi uNkulunkulu wenu ukuze akhonze onkulunkulu bezizwe lezo; qaphelani funa kube khona phakathi kwenu impande ethela izithelo ezibabayo.

19 Lapho umuntu onjalo esizwa amazwi alesisifungo, athokozele ukuthi isibusiso sehlele phezu kwakhe abesezitshela ukuthi, “Ngizavikeleka, lanxa ngiqhubeka ngizihambela ngezindlela zami.” Lokhu kuzaletha uhlupho olukhulu emhlabathini omanzi lowomileyo.

20 UJehova kazimiselanga ukumthethelela; ulaka lwakhe kanye lokutshiseka kwakhe kuzavutha phezu kwalowomuntu. Zonke iziqalekiso ezilotshwe kule incwadi zizakwehlela phezu kwakhe, njalo uJehova uzacitsha ibizo lakhe ngaphansi kwezulu. 21 UJehova uzamehlukanisa amsuse phakathi kwezizwana zonke zako-Israyeli amehlisele uhlupho, kusiya ngazo zonke iziqalekiso zesivumelwano ezilotshwe kule iNcwadi Yomthetho.

22 Abantwabenu abazakuza ngemva kwenu ezizukulwaneni ezilandelayo kanye labezizwe abavela emazweni akude bazabona izinhlupheko ezehlele lelilizwe lezifo uJehova azehlisele kulo. 23 Ilizwe lonke lizakuba ngelichithiweyo latshiswa laba litshwayi lesolufa – kungekho lutho oluhlanyelweyo, kungelalutho oluhlumayo, kungekho zimila kulo. Kuzafana lokutshabalaliswa kweSodoma leGomora, i-Adima kanye leZebhoyimi, uJehova awachitha ngolaka lwakhe oluvuthayo. 24 Izizwe zonke zizabuza zithi; “UJehova ukwenzeleni lokhu elizweni leli na? Kungani ulaka oluvuthayo lolwesabekayo na?”

25 Impendulo izakuba yikuthi: “Kungenxa yokuthi abantu badela isivumelwano sikaJehova, uNkulunkulu wabokhokho babo, isivumelwano asenza labo ekubakhupheni kwakhe eGibhithe. 26 Badukile bakhonza abanye onkulunkulu babakhothamela, onkulunkulu abangazange babazi, onkulunkulu angazange abaphe bona. 27 Ngalokho ulaka lukaJehova lwavutha phezu kwalelilizwe, waze wehlisela phezu kwalo zonke iziqalekiso ezilotshwe kule incwadi. 28 UJehova wabasiphula elizweni labo ngentukuthelo enkulu langolaka olukhulu wabalahlela kwelinye ilizwe, njengoba kunjalo lakhathesi.”

29 Okufihlakeleyo kungokukaJehova uNkulunkulu wethu, kodwa izinto ezambuliweyo zingezethu kanye labantwabethu kuze kube nini nini, ukuze silandele wonke amazwi alo umlayo.